Тауарлардың көрінісі фотосуретте көрсетілгеннен өзгеше болуы мүмкін

Ламикон 1%, 15 гр, крем

Қолжетімділігі
Тауар қолда жоқ
Үлгі
4823002207729
Елі
Украина
Өндіруші
Фармак ОАО
  • Сипаттама

Сипаттама

Дәрілік затты медициналық қолдану

жөніндегі нұсқаулық

ЛАМИКОН®

Саудалық атауы

Ламикон®

Халықаралық патенттелмеген атауы

Тербинафин

Дәрілік түрі

Крем 1% 15 г

Құрамы

1 г препараттың құрамында

белсенді зат – 100 % сусыз затқа шаққандағы тербинафин гидрохлориді - 0,01 г

қосымша заттар фенилэтил спирті, ақ жұмсақ парафин, минералды май (сұйық парафин), цетостеарил спирті, полиэтиленгликоль (макрогол) 20 цетостеарил эфирі, пропиленгликоль, полоксамер 407, натрий гидроксиді, тазартылған су.

Сипаттамасы

Ақ немесе ақ дерлік түсті, өзіне тән иісі бар крем.

Фармакотерапиялық тобы

Тері ауруларын емдеуге арналған препараттар. Тері ауруларын емдеуге арналған зеңге қарсыпрепараттар. Жергілікті қолдануға арналған зеңге қарсы препараттар.Жергілікті қолдануға арналған зеңге қарсыбасқа да препараттар.Тербинафин.

АТХ коды D01А Е15

Фармакологиялық қасиеттері

Фармакокинетикасы

Крем түрінде жергілікті қолданған кезде тербинафин гидрохлориді жүйелі қан ағымына тым шектеулі мөлшерде (қолданылатын дозасының 5%-ынан азы) сіңіріледі, сондықтан да оның жүйелі әсері өте төмен. Тербинафин гидрохлориді терінің дерма қабатына жылдам өтеді және липофильді мүйізгекті қабатта (соның ішінде май бездері мен шаш фолликулдарында) жинақталады. Айқын эпидермо- және онихотроптылығымен ерекшеленеді.

Жергілікті қолданған кезде тербинафин гидрохлориді жылдам әсер ете бастайды, қысқа мерзімді (7 күн) емдеуде тиімділігін танытады. Препараттың фунгицидтік әсер беруі үшін тербинафин гидрохлоридінің қажетті концентрациясы эпидермистің мүйізгекті қабатында емдеуді тоқтатқаннан кейін 7 күн бойы қалады.

Фармакодинамикасы

Тербинафин әсер ету ауқымы кең зеңге қарсы препарат, аллиламин туындысы болып табылады.

Тербинафин спецификалық тұрғыдан, скваленэпоксидаза ферментін тежеу арқылы зең жасушасы жарғақшасындағы стериндер биосинтезінің бастапқы сатысын бәсеңдетеді. Бұл эргостерол тапшылығына және скваленнің жасушаішілік жинақталуына алып келе отырып, зең жасушасының қырылуын туғызады. Скваленэпоксидаза ферменті Р450 цитохромы жүйесіне жатпайды, сол себепті тербинафин адамдағы Р450 цитохромы жүйесіне және, сәйкесінше, гормондардың немесе басқа дәрілік препараттардың метаболизміне әсер етпейді.

Тербинафин зеңдердің келесі түрлеріне қатысты фунгицидтік әсер береді (зең жасушасының қырылуын туғызады):

- Trichophyton (T. rubrum, Т. mentagrophytes, T.verrucosum, Т. tonsurans, Т. violaceum), Microsporumcanis, Epidermophyton

floccosum) сияқты дерматофиттер

- Pityrosporumorbiculare (Malassezia furfur ретінде де белгілі)

- зең саңырауқұлақтары

- белгілі бір диморфты зеңдер

Тербинафин ашытқылық зеңдерге (негізінен Candida тектес) қатысты белсенді, белсенділігі олардың түрлеріне қатысты фунгицидті немесе фунгистатикалық болуы мүмкін.

Ламикон® кремі қабынуға қарсы, қышынуға қарсы, эпителизациялайтын әсер береді.

Қолданылуы

  • терінің Trichophyton (мысалы, T. rubrum, T. mentagrophytes, T. verrucosum, T. violaceum), Microsporum canis және Epidermophyton floccosum сияқты дерматофиттерден туындаған зеңдік инфекцияларында, мысалы, табан дерматофитиясында; шат дерматофитиясында («жокей қышынуында»); арқа дерматофитиясында («құрғақ теміреткі»);
  • Candida тектес зеңдерден, әдетте Candidaalbicans-тен туындаған тері кандидозында;
  • Pityrosporum orbiculare-ден туындаған (Malassezia furfur ретінде де белгілі) түрлі-түсті теміреткіде (Pityriasis versicolor).

Қолдану тәсілі және дозалары

Ересектер мен 12 жастан асқан балаларға

Ламикон® кремін аурудың түріне байланысты, теріге тәулігіне 1 немесе 2 рет жағу керек. Кремді жағар алдында зақымданған аумақтарды мұқият тазалау және құрғату қажет. Кремді зақымданған тері мен оның айналасындағы бөліктерге жұқа қабаттап, сәл ысқылай отырып жағу керек. Базданумен жүретін инфекциялар кезінде (сүт бездері астының, саусақ араларының, шат аймағы мен бөкселер арасының) жаққан жерлерді, әсіресе түнде, дәкемен жауып қоюға болады.

Емдеудің ұзақтығы мен жиілігі.

Емдеу ұзақтығы ауру ағымының ауырлығына байланысты болып келеді:

  • аяқтың саусақаралық дерматофитиясында, шат дерматофитиясы мен арқа дерматофитиясында: 1 апта бойы тәулігіне 1 рет;
  • табанның сквамоздық-гиперкератоздық дерматофитиясында («мокасиндік табан»): 2 апта бойы тәулігіне 2 рет;
  • тері кандидозында: 1 апта бойы тәулігіне 1-2 рет;
  • түрлі-түсті теміреткіде: 2 апта бойы тәулігіне 1-2 рет.

Егде жастағы пациенттер үшін дозасын түзету керек емес.

Симптомдарының жеңілдеуі әдетте бірнеше күн ішінде орын алады. Жүйелі түрде қолданбау немесе емдеуді мерзімінен бұрын тоқтату рецидивіне алып келуі мүмкін.

2 апта емдеуден кейін жағдайдың жақсару белгілері болмаса, дәргерге көріну қажет.

Жағымсыз әсерлері

Жаққан жерде терінің қышынуы, қабыршықтануы немесе ашытып күйдіруі, жаққан жердің ауыруы мен тітіркенуі, пигментация бұзылуы, эритема, қабыршық түзілуі және басқа да жергілікті көріністер байқалуы мүмкін. Бұл елеусіз көріністерді бірен-саран жағдайларда хабарланатын және емдеуді тоқтатуды қажет ететін бөртпені қоса, аса жоғары сезімталдықреакцияларынан ажырата білу керек. Байқаусызда көзге тиіп кеткен жағдайда тербинафин гидрохлориді көздің тітіркенуін туғызуы мүмкін. Сирек жағдайларда жасырын зең инфекциясы өршуі мүмкін.

Жағымсыз реакциялары ағзалар жүйелері (MedDRA-ға сәйкес) мен туындау жиілігіне қарайжіктелген: өте жиі (≥1 / 10), жиі (≥1 / 100 және <1/10), жиі емес (≥1 / 1000 және <1/100), сирек (≥1 / 10000 және <1 / 1000) және өте сирек (<1/10000).

Болуы мүмкін жағымсыз әсерлері:

Иммундық жүйе тарапынан

Жиі емес: аса жоғары сезімталдық реакциялары.

Өте сирек: есекжем.

Көру мүшелері тарапынан

Сирек: көздің тітіркенуі.

Тері мен дәнекер тіндер тарапынан

Жиі: терінің қабыршықтануы, қышыну.

Жиі емес: терінің зақымдануы, қабыршық түзілуі, терінің бүлінуі, пигментация бұзылуы, эритема, терінің ашытып күйдіру сезімі.

Сирек: терінің құрғау сезімі, жанаспалы дерматит, экзема.

Жиілігі белгісіз: бөртпе.

Жалпы бұзылулар және жаққан жердегі реакциялар

Жиі емес: ауыру, жаққан жердің ауыруы, жаққан жердің тітіркенуі.

Сирек: симптомдардың өршуі.

Қолдануға болмайтын жағдайлар

  • тербинафинге немесе препараттың басқа компоненттеріне жоғары сезімталдық;
  • 12 жасқа дейінгі балаларға.

Дәрілермен өзара әрекеттесуі

Анықталмаған.

Айрықша нұсқаулар

Сақтықпен: бауыр және/немесе бүйрек жеткіліксіздігі, маскүнемдік, сүйек кемігі қанының түзілуінің бәсеңдеуі, ісіктер, зат алмасу ауруларында, аяқ-қол тамырларының окклюзиялық ауруларында.

Клиникалық көріністерінің айқындығының азаюы әдетте емдеудің алғашқы күндері байқалады.

Крем тек сыртқа қолдануға арналған. Кремнің көзге тиюін болдырмау керек. Крем байқаусызда көзге тиіп кеткен жағдайда, оны ағынды сумен мұқият жуу қажет.

Ламикон® кремінің құрамында цетостеарил спирті бар, ол терінің жергілікті тітіркенуін (мысалы, жанаспалы дерматитті) туғызуы мүмкін.

Тері микоздарының қайта жұқтырылуын болдырмас үшін, мына ережелерді сақтау қажет: іш киімді күн сайын ауыстыру, өйткені зең терінің инфекция жұққан беткейімен жанасқан киімде болуы мүмкін; тым тар немесе ауаны нашар өткізетін киім киюден аулақ болу; теріні зақымданған бөліктерін жуғаннан кейін мұқият құрғату; күн сайын жеке таза сүлгіні пайдалану. Табан микозы кезінде жалаң аяқ жүруге болмайды.

Сыртқа қолдану арқылы емдеуге қосымша тәулігіне 1 рет, шұлықтың немесе аяқ киімнің ішіне Ламикон® спрейін шашып қою ұсынылады.

Педиатрияда қолданылуы

Препараттың 12 жасқа дейінгі балаларға қолданылу тәжірибесі шектеулі, сондықтан препаратты пациенттердің бұл жас санатында қолданбаған дұрыс.

Жүктілік және лактация кезеңінде қолданылуы

Жүктілік және лактация кезеңінде қолдану ұсынылмайды.

Ламикон® препаратын қолданған кездегі адамдағы туа біткен аномалиялар жағдайлары туралы хабарламалар болған жоқ. Алайда, Ламикон® препаратын жүкті әйелдерде қолданудың клиникалық тәжірибесі шектеулі болғандықтан, препараттың сыртқа қолдануға арналған түрлерін жүктілік кезінде тек қатаң көрсетілімдер жағдайында ғана қолдануға болады.

Препараттың көлік пен қауіптілігі зор механизмдерді басқару қабілетіне әсер ету ерекшеліктері

Препарат көлік құралын немесе қауіптілігі зор механизмдерді басқару қабілетіне әсер етпейді.

Артық дозалануы

Жергілікті қолданған кездегі тербинафиннің жүйелі сіңірілуінің төмендігі артық дозалану ықтималдылығының аса төмен болуына түрткі болады. 30 г екі сықпаның ішіндегісін (құрамында 300 мг тербинафин гидрохлориді бар) байқаусызда жұтып қоюды Ламикон® препаратының 250 мг 1 таблеткасын (ішу арқылы қолдануға арналған дәрілік түрі) қабылдаумен салыстыруға болады. Кремнің көп мөлшерін байқаусызда жұтып қойған жағдайда, жағымсыз әсерлері Ламикон® таблеткаларының артық дозалануы кезіндегілерге (бас ауыруы, жүрек айнуы, эпигастрий аймағының ауыруы және бас айналуы) ұқсас болуы тиіс.

Байқаусызда жұтып қойған жағдайдағы артық дозалануын емдеу әсер етуші затын ең алдымен, белсендірілген көмірді қабылдау арқылы шығарудан және қажет болған жағдайда, симптоматикалық ем жүргізуден тұрады.

Шығарылу түрі және қаптамасы

15 г-ден алюминий сықпаға салынған. Әр сықпа медициналық қолдану жөніндегі мемлекеттік және орыс тілдеріндегі нұсқаулықпен бірге қорапшаға салынады.

Сақтау шарттары

Түпнұсқалық қаптамасында, 25оС-ден аспайтын температурада сақтау керек. Препаратты мұздатып қатыруға жол берілмейді. Балалардың қолы жетпейтін жерде сақтау керек.

Сақтау мерзімі

3 жыл

Препаратты қаптамасында көрсетілген жарамдылық мерзімі өткеннен кейін қолдануға болмайды.

Дәріханалардан босатылу шарттары

Рецептісіз

Өндіруші

«Фармак» ЖАҚ, Украина, 04080, Киев қ., Фрунзе к-сі, 74.

Тіркеу куәлігінің ұстаушысы

«Фармак» ЖАҚ, Украина

Қазақстан Республикасы аумағында тұтынушылардан өнім (тауар) сапасына қатысты шағымдарды қабылдайтын және дәрілік заттың тіркеуден кейінгі қауіпсіздігін қадағалауға жауапты ұйымның атауы, мекенжайы және байланыс деректері

Қазақстан Республикасындағы«Фармак» ЖАҚ өкілдігі

Қазақстан Республикасы, Алматы қ., индекс 050012, Амангелді к-сі 59 "А" "Шартас" бизнес орталығы, 9 қабат.

Тел +7 (727) 267 64 63, факс +7 (727) 267 63 73, электронды поштасы: a.liadobruk@gmail.com